ഗൂഗിള്‍ പ്ലസിന് സമ്പൂര്‍ണ അന്ത്യം, ഇനി ഗൂഗിള്‍ കറന്റ്‌സ്; പുതിയ ആപ്പുകള്‍ എത്തി

by Tech viruthan
ഗൂഗിൾ പ്ലസ് സേവനം ഗൂഗിൾ പൂർണമായും അവസാനിപ്പിക്കുന്നു. ഒരുകാലത്ത് ഫെയ്സ്ബുക്കിനെ ലക്ഷ്യമിട്ട് രംഗത്തിറക്കിയ ഗൂഗിൾ പ്ലസ് ഗൂഗിളിന്റെ പരാജയപ്പെട്ട ഉൽപ്പന്നങ്ങളിൽ ഒന്നാണ്. സാധാരണ ഉപയോക്താക്കൾക്ക് വേണ്ടിയുള്ള സേവനം ഗൂഗിൾ പ്ലസ് നേരത്തെ തന്നെ അവസാനിപ്പിച്ചിരുന്നു. ഇപ്പോൾ ഗൂഗിൾ പ്ലസിന്റെ എന്റർപ്രൈസ് പതിപ്പും പിൻവലിക്കുന്നതോടെ ഗൂഗിൾ പ്ലസിന് പൂർണ അന്ത്യമാവുകയാണ്.

ഗൂഗിൾ പ്ലസിന് പകരമായി ഗൂഗിൾ അവതരിപ്പിച്ചിരിക്കുന്ന സേവനമാണ് ഗൂഗിൾ കറന്റ്സ്. ഗൂഗിൾ പ്ലസിന്റെ ഐഓഎസ്, ആൻഡ്രോയിഡ് ആപ്ലിക്കേഷനുകൾ ഗൂഗിൾ കറന്റ്സ് എന്ന് പേരിൽ അവതരിപ്പിച്ചു കഴിഞ്ഞു. ഇന്ന് മുതൽ ഈ ആപ്പുകൾ ഡൗൺലോഡ് ചെയ്യാം.

നിലവിൽ സ്ഥാപനങ്ങളെ ലക്ഷ്യമിട്ട് അവതിരിപ്പിച്ചിരിക്കുന്ന ഗൂഗിൾ കറന്റ്സ്, സ്ഥാപനത്തിനുള്ളിലെ ആശയവിനിമയം മെച്ചപ്പെടുത്താൻ ലക്ഷ്യമിട്ടാണ് അവതരിപ്പിച്ചിരിക്കുന്നത്. ഇത് സാധാരണ ഉപയോക്താക്കൾക്കായി അവതരിപ്പിക്കുമോ എന്ന് വ്യക്തമല്ല.

പുതിയ ഇന്റർഫെയ്സും പുതിയ ചില ഫീച്ചറുകളുമായാണ് ഗൂഗിൾ കറന്റ്സ് എത്തിയിരിക്കുന്നത്. ഹോം സ്ക്രീനിൽ ഇഷ്ടാനുസരണം മാറ്റം വരുത്താം. പ്രാധാന്യം അനുസരിച്ച് പോസ്റ്റുകൾ ക്രമീകരിക്കുകയും ദൃശ്യമാക്കുകയും ചെയ്യാം.

ഗൂഗിൾ പ്ലസിനെ പോലെതന്നെ ഉപയോക്താക്കൾക്ക് പോസ്റ്റുകളിൽ കമന്റ് ചെയ്യാനും പോസ്റ്റുകളിലൂടെ ചോദ്യങ്ങൾ ചോദിക്കാനും അഭിപ്രായം പങ്കുവെക്കാനും സാധിക്കും. ഓരോ പോസ്റ്റുകളുടേയും പ്രചാരം എത്രത്തോളമുണ്ടെന്ന് പരിശോധിക്കാനുള്ള സംവിധാനവുമുണ്ട്. ടാഗുകളും വിഷയങ്ങളും ആളുകൾക്ക് ഫോളോ ചെയ്യാനാവും.

2011-ൽ അവതരിപ്പിക്കപ്പെട്ട ഗൂഗിൾ പ്ലസിന് ചുരുങ്ങിയ കാലംകൊണ്ട് തന്നെ നിരവധി ഉപയോക്താക്കളെ കിട്ടിയിരുന്നു. ജിമെയിൽ ഉപയോക്താക്കളിൽ വലിയൊരു വിഭാഗം ഗൂഗിൾ പ്ലസിലും അംഗങ്ങളായി. എന്നാൽ അംഗങ്ങളുടെ എണ്ണം ഏറെയുണ്ടായിരുന്നിട്ടും ഗൂഗിൾ പ്ലസിൽ ആളുകളുടെ വരവ് കുറവായിരുന്നു. ഒരു സോഷ്യൽ മീഡിയ എന്ന രീതിയിൽ ആരും തന്നെ ഗൂഗിൾ പ്ലസ് പ്രയോജനപ്പെടുത്തിയിരുന്നില്ല.


പലവിധ മാറ്റങ്ങൾ വരുത്തിയിട്ടും ഫെയ്സ്ബുക്കിനെയോ ട്വിറ്ററിനേയോ നേരിടാൻ ഗൂഗിൾ പ്ലസിന് സാധിച്ചില്ല.

2018 ഒക്ടോബറിലാണ് ഉപയോക്താക്കൾക്കുള്ള ഗൂഗിൾ പ്ലസ് സേവനം നിർത്തലാക്കുന്നതായി കമ്പനി പ്രഖ്യാപിച്ചത്. 2019 ഏപ്രിലിൽ സേവനം നിർത്തുകയും ചെയ്തു. ഇപ്പോൾ സ്ഥാപനങ്ങൾക്ക് നൽകിയിരുന്ന സേവനവും ഗൂഗിൾ അവസാനിപ്പിക്കുകയാണ്.